Ministerio di Hustisia ta responsabel pa órden hudisial, mantenshon di lei, seguridat i órden públiko na Kòrsou. E balornan klave ta: transparensia, responsabilidat, kalidat, inklusividat, integridat, konfiabilidat, durabilidat i koperashon.
Ministerio di Hustisia di Kòrsou ta dirigí primeramente riba:
- Desaroyá maneho;
- Konsipiá legislashon hudisial;
- Kontribuí na kalidat di funshonamentu den e kadena hudisial;
- Pèrkurá pa seguridat, órden i trankilidat den komunidat di Kòrsou tantu di e siudadanonan komo di tur persona ku ta temporalmente na Kòrsou.
Mishon Ministerio di Hustisia:
Kuida e órden legal di pais, mantenshon di lei i seguridat i órden públiko.
Ministerio di Hustisia konosé dos sektor di ehekushon:
E sektor di Mantenshon di Lei, Órden Públiko i Seguridat, ta konsiderá e sektor mas pisa di hustisia.
Bou di e sektor akí tin e siguiente organisashonnan:
- Kuerpo Polisial Kòrsou (KPC)
- Servisio di Atmishon (TO)
- Brantwer Kòrsou
E sektor pa Protekshon di Hubentut, Ehekushon i Resosialisashon ta enkargá ku protekshon di menor, prevenshon di kriminalidat entre otro bou di hóben i detenshon di hóbennan i adulto ku énfasis riba resosialisashon. E sektor akí ta konsistí di e organisashonnan:
- Sentro di Detenshon i Korekshon Kòrsou (SDKK)
- Reclassering Curacao
- Justitiële Jeugdinrichting Curaçao (JJIC)
- Justitiële Zorg (JZ)
E organisashonnan di e sektor akí ta enfoká riba ehekushon di nan tareanan manera ta preskribí den lei i ehekushon di maneho dirigí riba e áreanan akί.
Ministerio di Hustisia ta konsistí tambe di e ‘supra-sektoral’ ta e organisashonnan ku den e struktura di e ministerio ta kai riba e otro sektornan. E organisashonnan akί ta riba nan mes, den e sentido nan ta mas independiente ku e otro organisashonnan. Tin tres organisashon ku ta kai bou di e ‘Bovensectorale Organisaties’ kual ta:
- Opleidingsinstituut Rechthandhaving en Veiligheid (ORV)
- Landsrecherche Curaçao (LrC)
- Nationaal Centraal Bureau Interpol Curaçao (NCB IC).
Banda di esaki tin un departamentu di maneho ku ta responsabel pa desaroyá, implementá i mantené tur maneho i lei di henter e kadena hudisial.
