DI UN SOÑO PA REALIDAT: HÓBENNAN DI JJIC TA DISEÑA NAN PROPIO TAS

Willemstad – Resientemente a tuma lugá un bunita proyekto entre JJIC, Fundashon Amigunan di G.O.G i SDKK. Kaminda kreatividat, talento i un segundo oportunidat tabata e meta prinsipal.
Bou di e lema “Design Your Own Bag”, hóbennan di JJIC a haña e oportunidat pa diseña nan propio tas, mientras ku klientenan di SDKK a transformá nan ideanan den tasnan real.
E hóbennan a pone nan kreatividat riba papel, kaminda ku nan por a skohé nan propio diseño, den kombinashon di koló i estilo. Despues e klientenan ku ta traha den tayer di fura stul di SDKK a traha e tasnan komo parti di e proyekto Baglab i Back to School.

E resultado ta tasnan úniko, pero tambe algu hopi mas balioso; un konekshon entre kreatividat di un hóben i talento di klientenan di SDKK ku ta laborá den e tayer di fura stul.
Klientenan ku ta forma parti di e proyekto “Bag Lab”, ta haña guia diariamente di sra. Suhaily Olbina, kende ku su dedikashon i empuhé ta e motor tras di e proyekto aki. Bou di su guia, klientenan ta desaroyá nan abilidat, kreatividat, presishon den trabou i responsabilidat.
E proyekto ta mustra ku talento i kreatividat no konosé frontera. Un idea simpel riba papel por transformá den un produkto real ora hende haña e espasio, guia i oportunidat pa desaroyá su kapasidat.
Pa SDKK, Baglab ta mas ku solamente traha un tas. E ta forma parti di nos tarea di resosialisashon: duna klientenan un segundo oportunidat pa deskubrí i desaroyá nan talentonan, siña un fishi i traha riba un futuro ku perspektiva.

Nos ta sumamente orguyoso di e kolaborashon ku JJIC, Fundashon Amigunan di G.O.G, i e resultado di e proyekto. Un danki na kada un di e klientenan i nan guia ku a sa di demostrá nan talento pa e bunita tasnan fuerte i di kalidat, di forma ku e hóbenan di JJIC, por lusi ku un bunita tas di nan soño pa aña eskolar nobo.

Finalmente un mucha tabatin un soño, un kliente a kreá i huntu nan a transformá un diseño den realidat.