KIKO i e Man - Protekshon di Mucha kontra Abusu seksual i Violensia
E kampaña “KIKO i e Man” ta un inisiativa preventivo di Ministerio di Hustisia di Kòrsou, ku e intenshon pa protegé mucha kontra violensia i abusu seksual. E kampaña ta basá riba e proyekto Oropeo “Kiko en de hand”, desaroyá pa Konseho di Oropa, i adaptá na e konteksto lokal di Kòrsou.
E kampaña, ku a keda lansá na Kòrsou dia 18 di novèmber 2024, tin komo meta pa konsientisá i sostené muchanan, mayornan i profeshonalnan den rekonosé i prevení komportashon inapropiá.
Meta i ambishon di e kampaña
E kampaña ta enfoká riba:
- Hasi e mucha konsiente di su límite personal;
- Siña e mucha di su derecho pa bisa “nò”;
- Enfatisá kon importante ta pa buska yudansa si bo ta sinti bo insigur;
- Promové konosementu di derechonan di mucha;
- Fortalesé e mucha su abilidat pa protegé su mes;
- Enkurashá e mucha pa rekonosé i raportá komportashon inapropiá.
Di e manera akί e metanan ta kontribuí na redusí kasonan di abusu seksual i fortifiká e posishon hurίdiko di e mucha. E kampaña ta dirigí na mucha, mayor, maestro i henter komunidat di Kòrsou.
E buki pa mucha
E kampaña ta usa e buki “Kiko i e Man”, ku ta splika di un manera fásil pa mucha komprendé kiko ta límite personal.
Ku yudansa di “Ondergoedregel”, e buki ta siña ku niun hende no mag mishi ku nan kurpa sin pèrmit. E ta enkurashá nan tambe pa buska yudansa serka un adulto di konfiansa si nan ta sinti nan mes inkómodo òf insigur.
E material ta disponibel na Papiamentu, Hulandes, Ingles i Spañó, pa asina henter komunidat na Kòrsou por komprendé e mensahe.
Edukashon i prevenshon
Pa skolnan e kampaña ta disponé di materialnan informativo den forma di pakete di lès spesial pa e dosente por usa den klas.
Mayor i dunadónan di kuido tambe ta enkurashá pa papia habrí ku muchanan tokante nan kurpa, rèspèt propio, i nan derecho di bisa ‘nò’.
Resientemente a organisá vários aktividat i seshon di konsientisashon pa hasi e temanan akί habrí pa diskushon den skol i den komunidat.
Partisipashon di komunidat
Pa fortalesé protekshon di mucha, komunidat ta enbolbí aktivamente den e kampaña. Pa medio di kombersashonnan informativo, mayornan, maestronan i profeshonalnan den edukashon ta risibí hèrmèntnan práktiko pa rekonosé señalnan di abusu seksual i tuma medidanan preventivo. Ministerio di Hustisia ta kolaborá ku entre otro Justitiële Zorg pa sostené muchanan den situashonnan vulnerabel.
Ademas di e buki tin poster, flyer i otro material visual disponibel pa yuda muchanan komprendé e “Regla di Paña Interior”.
Ku “Kiko i e Man”, Kòrsou ta dal un stap importante den e lucha kontra abusu seksual di mucha. Pa medio di esfuersonan konhunto di gobièrnu, institutonan edukativo i komunidat, nos ta trahando pa un ambiente sigur kaminda muchanan ta sinti nan mes protegé i skuchá.
Pa mas informashon por tuma kontakto ku:
Justitiële Zorg
Adres: Waaigat #1
Telefòn: +599 9 461 6166
Emeil: [email protected]
Pa un bishita di KIKO na bo skol òf proyekto, klik aki i yena e formulario.
