Rib’é Lugá – Registrashon i Legalisashon 2026

Rib’é Lugá ​​ta un inisiativa di Ministerio di Hustisia di Kòrsou den kolaborashon ku Ministerio di Desaroyo Sosial, Labor i Bienestar. E trayekto Rib’e Lugá ta un trayekto di registrashon i legalisashon práktiko i fásil. E ta duna tur persona indokumentá na Kòrsou e posibilidat pa registrá pa un pèrmit di estadia temporal, basta ku nan ta kumpli ku e kondishonan.

Ku e trayekto aki, gobièrnu ke haña un mihó bista riba e grupo di personanan indokumentá na Kòrsou i kontribuí na un maneho di migrashon mas strukturá i prepará pa futuro.

Minister di Hustisia, Shalten Hato, ta enfatisá:
“Ku Rib’e Lugá nos ta dal un paso importante den direkshon di mas órden i klaridat, pero mas importante ainda, humanidat. Nos ta duna hende ku ya ta forma parti di nos komunidat e oportunidat pa regla nan situashon di un manera honesto i transparente. Ku e lansamentu di e wèpsait , nos ta hasi e proseso aksesibel pa tur hende. Nos ta kontentu di mira ku djis despues di e ‘go-live’ di e wèpsait, ya tin hopi interes pa e trayekto di legalisashon.”

Pa ken Rib’e Lugá ta?

Bo ta bin na remarke pa e proyekto aki den kaso ku :

1. Bo por demostrá ku bo a drenta Kòrsou promé ku 13 di novèmber 2025 i ta biba aki ainda;
2. Bo no tin antesedente penal.

Esaki ta konta pa tur persona ku a drenta legalmente pero a pasa nan periodo di estadia, òf tur persona ku a drenta ilegalmente i nunka a wordu atmití.

E prosedura

E trayekto lo dura tres luna i ta tuma lugá kompletamente digital. Durante di e periodo aki, ta evaluá tur petishon segun kriteria kla definí, ku posibilidat pa risibí un pèrmit di estadia temporal di 1 te 3 aña, dependé di e propósito di estadia. E trayekto ta ofresé diferente ruta pa legalisashon, manera pa trabou, negoshi propio òf famia ku ta reuni. Tin atenshon speshal pa protekshon i futuro di menor di edat.

Dokumento nesesario pa registrá

Prepará e siguiente dokumentonan:

1. Prueba di pago di tarifa di servisio i atribushonan;
2. Pasport: Bálido òf kaduká (tuma nota: e pasport mester ta bálido na momentu di entrega di pèrmit).
3. Akto di nasementu: Máksimo 1 aña, ku apostille òf legalisá.
4. Deklarashon di bon kondukta (VOG): Pa personanan di 18+, no mas bieu ku 3 luna, for di e ultimo lugá di residensia.
5. Prueba di seguro médiko: bálido mínimo 1 aña na momentu di entrega di e pèrmit.
6. Dokumento adishonal: Dependiendo di e meta di e pèrmit.

Kon bo por demostrá ku bo yegada ta promé ku 13 di novèmber 2025?

Bo mester por demostrá ku bo tabata presente na Kòrsou na e fecha stipulá. Esaki por hasi ku:

• Un ticket di biahe na bo nòmber;
• Un faktura di un institushon finansiero lokal na bo nòmber;
• Un deklarashon di un “trusted partner”.

Ministerio di Hustisia ta traha huntu ku diferente trusted partners pa brinda sosten kaminda ta nesesario. Bo mes por hasi e registrashon sin intermediario. Klek riba e boton aki pa kuminsá e proseso di petishon.

Pa mas informashon, bishita nos páginanan di social media.