Wòki Tòki – Un Paso pa Konsientisashon i Prevenshon
Na mart 2025, Ministerio di Hustisia di Kòrsou a estrená e pelíkula Wòki Tòki, dirigí pa e sineasta lokal Greyan Pastor den estrecho kolaborashon ku Minister di Hustisia Shalten Hato. E pelíkula ta sirbi komo punto di salida pa un plan di prevenshon. E plan aki ta enfoká riba seguridat, konsientisashon i ta dirigí riba varios grupo di enfoke na Kòrsou.
E nifikashon di e nòmber Wòki Tòki
E nòmber Wòki Tòki ta derivá for di “walkie talkie”, un medio esensial di komunikashon den e ministerio. E ta wòrdu usá pa polis den kaso di melding, den prizòn pa komunikashon entre departamentunan, i simbólikamente komo un último bos na momentu ku un persona fayesé. E título ta enfatisá e importansia di komunikashon: tantu komo un medio pa garantisá seguridat komo un medio pa intervení na tempu i prevení eskalashon.
E pelíkula: un historia sosial fuerte
E pelíkula Wòki Tòki ta konta e historia di vários personahe ku ta drenta den kontakto ku e sistema hudisial di un manera òf otro. Pa medio di empatia, solidaridat i konsientisashon, e pelíkula ta mustra ku speransa nunka mester bai pèrdí.
Minister di Hustisia Shalten Hato tambe ta aktua den e pelíkula huntu ku figuranan konosí den nos komunidat, manera Kantado Mayo 2026 Sharrel ‘Adjatay’ Denisia, Miss Universe Curaçao 2013 Eline de Pool, i e empresario Jean-Paul Fernandes.
Wòki Tòki ta atendé e konsekuensia di komportashon iresponsabel, manera kandela i aktividatnan kriminal, i ta enfatisá e importansia di tuma desishon korekto. E pelíkula ta posibel ku kontribushon importante di organisashonnan den e kadena hudisial, entre otro Brantwer Kòrsou i Kuerpo Polisial Kòrsou.
Wòk’i Tòk’i Prevention Expo
Banda di e pelíkula, e plan di prevenshon a konsistí di un Expo di Prevenshon na 2025. Un evento ku e meta pa duna informashon interaktivo tokante prevenshon i seguridat.
E organisashonnan partisipante a duna demostrashon i a parti vários hèrmènt útil relashoná ku e tema di prevenshon, manera detektor di huma.
Ku e pelíkula, e expo, i e plan di prevenshon, Ministerio di Hustisia ta dal un paso importante pa konsientisá nos komunidat i asina mehorá seguridat. Pa medio di arte, edukashon, i kolaborashon ku partnernan den e kadena hudisial ta hasi esfuersonan pa logra kambio di komportashon duradero rònt Kòrsou.
Wòki Tòki tei pa bo
Despues di e tremendo akogida durante e periodo na The Movies/IMAX, awor ta toka turno pa skolnan, organisashonnan i barionan. Bo ke pasa e pelíkula di Wòki Tòki na bo organisashon? Klik riba e boton i yena e formulario di petishon!
