Justitiële Zorg (Kuido Hudisial)

E kuater organisashonnan Voogdijraad, Ambulante Justitiële Jeugdzorg Curaçao (AJJC), Gezinsvoogdij Instelling (GVI) i Slachtofferhulp a uni forsa bou di un dak pa optimalisá e servisio na nan klientenan. E organisashon nobo ta karga e nòmber ‘Justitiële Zorg’.

Justitiële Zorg (JZ) ta garantisá protekshon i kumplimentu ku tur derecho di mucha manera stipulá den e ‘Tratado Internashonal di Derecho di Mucha’. Justitiële Zorg ta ofresé programanan di reintegrashon pa mucha i hóben i ta guia e sistema di famia. Tambe nan ta duna guia na famianan ku a bira víktima di violensia. Banda di esaki ta tarea di Justitiële Zorg pa duna konseho tokante alimentashon di menor i fasilitá kobransa i pago di alimentashon serka mayornan.

E mishon ta pa brinda seguridat na famia den tal forma ku nan ta desaroyá abilidatnan pa nan ta resiliente durante tempunan difísil.

E vishon di Justitiële Zorg ta un organisashon di profeshonalnan ku pashon pa guia i fortifiká e sistema familiar. E profeshonalnan ta aktua na interes di nan klientenan i ta duna servisio transparente.

Tareanan Prinsipal:

Un punto sentral pa raportá violensia doméstiko y spesífikamente abusu di mucha;
Hasi investigashon i duna konseho hurídiko;
Duna guia individual òf familiar i realisá intervenshonnan (legal);
Realisá prevenshon i reintegrashon;
Fasilitá mayornan den kumpli ku nan obligashonnan di mantenshon;
Brinda sosten durante prosedimentu hurídiko na víktimanan di delitonan penal i aksidentenan fatal den tráfiko, pa asina limitá daño material i/òf inmaterial mas tantu posibel.