Landsrecherche Curaçao (LrC)
Landsrecherche Curacao (LrC) ta hasi investigashon kontra di empleado públiko i personanan ku ta traha na institutonan semi gubernamental ku a kometé un echo kastigabel i konsekuentemente a afektá integridat di gobièrnu. Ku institutonan semi gubernamental ta referί na por ehèmpel fundashonnan i kompanianan anónimo ku ta enkargá ku un tarea spesífiko di gobièrnu.
E mishon di LrC ta pa kontribuí na garantisá un gobièrnu konfiabel i honesto.
Ta adaptá LrC fundamentalmente for di investigashon represivo na un kombinashon di investigashon represivo i proaktivo. Konsekuentemente, LrC ta un organisashon íntegro di informashon i proseso den kual e (sub)prosesonan operashonal huntu ta kontribuí na realisashon di e mishon.
Investigá imparsialmente i independientemente echonan kastigabel i/òf komportashon ku por tacha seriamente integridat di poder legislativo, ehekutivo i hudisial.
Den koperashon ku partnernan eksterno, LrC ta spera di por realisá e ambishon akί pa medio di entre otro:
- Primeramente investigá efektivamente i ku represhon violashon di normanan i balornan stipulá;
- Kontribuí na inisiativanan ku por kondusí na mehorashon di e aktitut profeshonal i na oumento di e konosementu di riesgo den organisashonnan (semi) gubernamental;
- Yuda garantisá integridat di e aparato gubernamental di Kòrsou;
- Yuda kombatí debilitashon di e estado di derecho di Kòrsou;
- Kontribuí na inisiativanan ku ta kondusí na realisashon di medidanan físiko, logístiko i organisatorio pa minimalisá riesgo pa organisashonnan (semi)gubernamental.
Ki tipo di investigashon LrC ta hasi i ken ta e suhetonan di investigashon di LrC?
Riba órden di Prokurador General, LrC ta enkargá pa kondusí investigashon i/òf averigua echonan den kaso di:
- Krímen kometé pa un polítiko, empleado públiko, huesnan, miembronan di ministerio públiko, hefenan di servisio, direktornan di organisashonan enkargá ku un tarea di gobièrnu;
- Krímen relashoná ku funshon kometé pa otro empleado públiko enkargá ku tarea di gobièrnu, kaminda e krímen por krea benefisio material òf inmaterial i por kousa algun desbentaha serka gobièrnu òf personanan privá;
- Empleado públiko òf funshonarionan di organisashon enkargá ku tarea di gobièrnu ku legalmente ta enkargá ku un tarea di investigashon i ku ta kometé krímennan den violashon di e deber ofisial aki.
Ayudo di i na LrC
Den e ehekushon di su tarea LrC por haña asistensia for di servisionan den Reino Hulandes (Landsrecherche Aruba, Landsrecherche Sint Maarten i Rijksrecherche) i di Team Bestrijding Ondermijning. Riba petishon LrC tambe ta yuda su servisionan ruman i Team Bestrijding Ondermijning. Ademas, LrC ta traha huntu ku Korps Politie Curacao (KPC) i Recherche Samenwerkingsteam (RST) pa duna sierto ekspertisio na terser partido.
Notifikashon i denunsia
Na LrC, despues di hasi un sita telefóniko, por hasi denunsia di delitonan penal manera a ser deskribí ariba. Sinembargo, un investigashon pa LrC ta inisiá solamente despues ku un òrdu di investigashon a keda emití pa Prokuradó General. Notifikashon di violashon di integridat tambe por ser presentá na LrC i lo evaluá esaki kuidadosamente. Si tin indikashonnan konkreto, LrC por pidi na Prokuradó General pa emití un òrdu di investigashon.
Kontakto
Adrès: Scharlooweg 100
Number di Telefòn: +5999-4650402
Email adrès: [email protected]
Piketdienst: Pafó di orario di ofisina, por yega na LrC via e sala di kontrol di Kuerpo Polisial Kòrsou.
