Servisio di Atmishon Kòrsou

E Servisio di Atmishon Kòrsou ta kai bou di Ministerio di Hustisia i ta enkargá ku implementashon di lei pa stranheronan na Kòrsou. E organisashon ta responsabel pa prosesá petishonnan di personanan ku ta deseá di establesé nan mes na Kòrsou. Ta evaluá petishonnan konforme e Lei di Atmishon i Ekspulshon (‘Landsverordening Toelating en Uitzetting’).

E mishon di e organisashon ta pa na un manera desisivo, profeshonal i honesto evaluá petishonnan (di atmishon) di personanan basá riba lei i reglanan vigente den un periodo stipulá.

E vishon ta un organisashon profeshonal i dinámiko pa atmishon di personanan na Kòrsou konforme reglanan vigente.

Metanan prinsipal

Pa prosesá petishon pa atmishon, residensia i naturalisashon na un manera planiá, profeshonal, hustu i dirigí na kliente, di moda ku ta atendé e nesesidatnan di e kliente di akuerdo ku lei i regulashonnan aplikabel.
Suministrá informashon korekto, kompleto, komprendibel i uniforme na klientenan, kaminda den kasonan spesífiko ta adaptá e informashon mas tantu posibel na e nesesidatnan spesífiko di e kliente.
Promové koperashon den e organisashon interno den e kadena di imigrashon ku otro stakeholdernan importante pa medio di kordinashon adekuá di prosesonan, proseduranan i sistemanan (di informashon).
Kontribuí na desaroyo di maneho riba tereno di kuido di imigrashon.