Asistensia Hurídiko Grátis

Introdukshon

Tur hende tin derecho riba asistensia hurídiko, asta si bo no tin sèn pa paga un abogado. E derecho akί ta stipulá den artíkulo 6 di e Tratado Oropeo pa Derechonan Humano i den artíkulo 20 di Konstitushon di Kòrsou.

Pa hasi e derecho akί posibel, gobièrnu di Kòrsou a introdusí e Dekreto Nashonal di Asistensia Hurídiko Grátis.

Ken por apliká?

Bo por apliká pa un tarheta pa asistensia hurídiko grátis si bo:

• Ta biba na Kòrsou;
• Mester di asistensia hurídiko;
• Tin un entrada anual riba kua mester paga impuesto di máksimo Cg. 22.500.

Eksepshon:
Si bo entrada ta mas ku Cg. 22.500 pa aña pero bo no por paga e gastonan di abogado, Minister di Hustisia por duna dispensashon. Esaki ta wòrdu hasi a base di bo situashon finansiero.

Kon pa apliká?

1. Pa kaso sivil (Pues kaso ku no ta laboral):

Bishitá Kas di Bario di Ministerio di SOAW den bo bario.

1. Pa kaso di trabou:

Tuma kontakto ku Sektor di Labor di Ministerio di SOAW.

Kiko bo tin mester?

Si bo a wòrdu referí dor di SOAW, por fabor manda e siguiente dokumentonan pa dispensashon na Ministerio di hustisia via email na [email protected]:

1. Un karta ku petishon na Minister di Hustisia ku e splikashon di e motibu ku bo ta rekerí un abogado pro bono.
2. Lista di gastu mensual yená i firmá inkluso komprobante, por ehèmpel resibu di aqualectra etc. Si e gastunan ta aparesé riba e statement di banko, no mester prueba adishonal;
3. Formulario di “Belastbaar Inkomen” di aña anterior di ofisina di impuesto;
4. Dos último slep di salario;
5. Dos último bankstatement;
6. Identifikashon bálido, sédula òf reibeweis òf pasport. Si usa reibeweis òf pasport mester inkluí un uittreksel di “Kranshi”.
7. Si bo no tin nashonalidat Ulandes mester inkluí bo pèrmit di estadia tambe.
8. Karta di retiro (si ta trata di retiro).

Gastu

Na promé instante no tin gastu mara na un petishon pa un abogado pro bono.

Pero den kaso di un disputa di trabou bo ta paga un kontribushon personal pa e abogado pro bono, manera determiná den artíkulo 2a di e Dekreto Nashonal di Asistensia Hurídiko Grátis.

Durashon

E tempo di espera pa un dispensashon ta máksimo 5 siman.

Partikularidat

Bo ta malkontentu ku e yudansa di bo abogado asigná?

• Por entregá un keho na Minister di Hustisia.
• E keho ta wòrdu investigá pa determiná si e ta hustifiká.

Bo tin pregunta òf bo ke mas informashon? Bishitá un Kas di Bario den bo bario.