Alimentashon
Introdukshon
Alimentashon di menor tin komo meta pa mehorá bienestar di e mucha i brinda e sosten finansiero nesesario.
For di promé di yanüari 2025, tin regla nobo pa entregá un petishon pa alimentashon via Justitiële Zorg (JZ). E ahuste ta pa hasi e proseso mas fásil i aksesibel pa mayornan i tutornan. Tambe pa duna yudansa èkstra na esnan ku mester.
Kiko e ta enserá?
Alimentashon di menor ta importante pa kuido i kriansa di mucha. Si un mayor no kumpli ku e obligashon akί, e otro mayor por entregá un petishon na wes.
E ta konta tambe pa:
- Yunan di kriansa;
- Adultonan hóben te ku 25 aña di edat ku ta studiando ainda.
E reglanan nobo ta ofresé dos opshon:
- Presentá un petishon di bo mes, òf
- Risibí asistensia di Justitiële Zorg (JZ).
Kiko tin mester?
E siguiente dokumentonan ta nesesario pa e petishon:
- Presupuesto: Bista general di gastunan di e yu, segun guia di alimentashon di menor.
- Petishon: E montante deseá pa e kontribushon mensual.
- Uittreksels di Kranshi (Basisregisters):
- Lange uittreksel di e solisitante, kontrapartido i e mucha (ku adrès residensial);
- Akta di nasementu di e mucha;
- Spesifikashon di entrada: Prueba di entrada di e aplikante i, si ta posibel, di e otro partido.
- Dokumentashon Adishonal: Por ehèmpel, salaris slep, deklarashon di impuesto, akuerdo di hür òf deklarashon di debe, si ta disponibel.
Prosedura
- Entregá independientemente
Mayornan, tutornan of hóben adulto (te 25 aña) por presentá un petishon na Korte Komun di Hustisia.
- Entregá ku sosten di Justitiële Zorg (JZ)
Durante un sita, JZ ta yuda ku:
- Kolektá tur dokumento nesesario;
- Traha un petishon kompleto;
- Entregá e petishon, si ta nesesario (por ehèmpel, den kaso di mayornan ku un desabilidat òf adultonan yòn ku ta studiando).
Gastu
E gastunan pa entregá un petishon ta lo siguiente:
- Gastunan di korte: Cg. 50,-;
- Gastunan di stampia: Cg. 20,-;
- Uittreksel di Kranshi:
- Cg. 10,- pa kada uittreksel;
- Cg. 20,- pa un akta di nasementu.
Mas informashon i kontakto
Entregá independientemente:
Wak e ehèmpel petishonan riba: www.hustisia.cw, www.gemhofvanjustitie.org
Sosten via JZ:
Tuma kontakto ku Departamentu di Onderhoudsplicht:
Telefòn: 461-6166 òf 661-8257
WhatsApp: 671-8259
Email: [email protected]
Kuminsá bo aplikashon na tempu pa evitá retraso. Bienestar di bo yu ta na promé lugá!
