Brantwer Kòrsou

Brantwer i Maneho di Kalamidat Kòrsou

Brantwer Kòrsou ta responsabel pa e siguiente áreanan di resultado: seguridat kontra kandela, asistensia tékniko den kaso di aksidente i kontrol di kalamidat. E organisashon ta duna yudansa den situashon kaminda tin un disrupshon serio den órdu públiko i kaminda bida, salú i bienestar di siudadanonan, bestia i naturalesa ta na peliger. Tambe Brantwer Kòrsou ta enkargá ku preparashon i koordinashon di e organisashon pa maneho di desaster.
Ku e transishon pa pais Kòrsou riba 10 di òktober 2010, e organisashon a haña e nòmber ofishal: “Uitvoeringsorganisatie Brandweer en Rampenbestrijding”.

Ròl i Responsabilidatnan

Aunke Brantwer ta konosí pa su trabounan pa paga kandela, ta importante pa enfatisá ku Brantwer ta hasi muchu mas ku esei.

E aktividatnan diario di kada departamento ta lo siguiente:

Departamentu ’Stafbureau’

Responsabel pa desaroyá, implementá i evaluá instrumentonan di maneho den e áreanan di planifikashon, kòntròl i asuntunan finansiero, HR, ICT, sosten atministrativo i sekretarial, kordinashon di proyektonan. Tambe pa programanan ku ta sali for di kolaborashon ku “Veiligheidsregio Rotterdam-Rijnmond” i koordinashon di relashon públiko i aktividatnan di informashon.

Departamentu di Prevenshon

Ta desaroyá, implementá i evaluá maneho riba área di prevenshon, inkluso konseho riba kondishonnan di pèrmit, plannan di desaroyo i plannan di destinashon. E departamentu ta enkargá tambe ku kontrol di seguridat kontra kandela i edukashon riba prevenshon.

Departamentu di Preparashon, Maneho di Desaster i Entrenamentu

Responsabel pa desaroyá, kordiná e kreashon, ko-implementá i evaluá maneho, plannan i proseduranan di preparashon (manera plannan pa maneho kalamidat, plannan di entrenamentu, plannan di ehersisio i plannan di atake). E departamentu ta organisá i kordiná kursonan di entrenamentu tékniko di servisio di bombero, programanan di entrenamentu i ehersisionan. E departamentu ta konsehá i sostené riba asuntunan multi- i monodisiplinario i ta manehá fasilidatnan di kontrol di kalamidat.

Departamentu di Represhon, Mantenshon i Logístika

Enkargá ku desaroyá, implementá i evaluá maneho riba e áreanan di represhon, mantenshon i logístika. Esaki ta inkluí e unidatnan di emergensia i e sekshon di mantenshon i logístika.

Uitrukeenheden
Responsabel pa kombatimentu di kandela i asistensia tékniko. Asistensia tékniko ta enserá, entre otro, kitamentu di peliger (p.e. zeta riba kaminda, palu grandi ku ta kai, aksidente ku ta enserá supstansianan peligroso), reskatá/liberá hende i bestianan pegá den outo òf otro aksidentenan. Tambe reskate di hende i bestia for di un haltura of profundidat (piedra, buraku, etc.); E komponente di tarea aki yama ‘touwredding’. Pa esaki, diariamente ta realisá ehersisionan riba tur aspekto di ehekushon di tarea. Banda di e ehersisionan tékniko di kuerpo di bombero, bomberonan tambe ta enkargá ku trabounan di mantenshon diario na Kazerne.
Sekshon di Mantenshon Tékniko i Logístika
Responsabel pa e mantenshon, kompra i reparashon di ekipo i hèrmèntnan ousiliar, spesifikashonnan i kompra, depósito, konekshonnan, mantenshon di aire komprimí i suministro di awa pa kombatimentu di kandela.